එතෙර වන්නට සසර බැමි බිඳ

සැලි සැලී ලෙළදෙනා බෝපත් වෙත යොමන නෙතු පියවිලී

නොමසැලී පිහිටුවා එකමෙක අරමුණක තම සිතුවිලී

දිලි දිලී හිඳ සැනින් නිවෙනා පහන් දැල්ලක වූ දැලී

යළි යළී පවසනා දේ ඇති අරුත කළ මැන පැහැදිලී

 

ඇමදලා එක රටාවට තැබු වැලි මළුව යළි සැනෙකිනේ

අපිළිවෙල කළ පා ලකුණු හා පත් සමඟ වෙර නොම ගෙනේ

සිත කිළිටි කළ පවිටු සිතුවිලි විටින් විට කළ සක්මනේ

නොකිලිටිව සිත සුපිරිසිදු කළ හැකිද නැවතත් හිමියනේ

 

නොයෙක් දුක් විඳ විලෙන් මතුවන සත්පියුම නටුවෙන් මුදා

බුදුන් පාමුල පුදන විට විල සාදු නද දුනි තුති පුදා

සුවහසක් දුක් විඳ සැදූ තම පුතා බුදු සසුනට පුදා

ඔබේ මවුතුමි බුදුවන්න මතු පාරමී පුරනෙද මෙදා

 

එතෙර වන්නට සසර බැමි බිඳ මැරි මැරී උපදින බවේ

සොළොස්වසකුත් පිරෙන්නට පෙර වැටහුනිද අනියත ලොවේ

සිත් සතන් වල්මතින් මුදවන බණ පදයකින් ඔබෙ මුවේ

සතර වැලවරිගයම එපිනෙන් මෙත් බුදුන් කල රහත් වේ

වෙන මඟක ගිය නුඹ..

සුන්දරයි මුත් එමඟ

තනිව යන්නෙද කෙලෙස

අහම්බෙන් පැමිණි නුඹ

මඟ කිවූ අපූරුව

පා නැගිමි රිසි ලෙසට

පියෙන් පිය ඉදිරියට

හැරී බැලුවෙමි වරෙක

යන එමඟ අතරමඟ

පැමිණ මම බොහො දුරක්

නොහැක යළි හැරෙන්නට

කියා දුන් මඟ හසර

නුඹ ගොසින් වෙන මඟක

日本人がんばって。。！ ඉදිරියටම යමු ජපනුනි..!

ග්‍රීස්මය හා සබඳ කම් ඇති දා බිඳෙන් ගත තෙත් වෙතේ

සීත ඊර්තුව පුරාවට මුළු ඇඟෙම හිරි ගඩු යළි පිපේ

මෙය පරස්පරයක් වුවත් කෙලෙසනා වීරිය රැඳි ගතේ

තරම්වත් රේණුවක් සකුරා අඩු නොවුණි අදිටන සිතේ

පොළොව සෙලවී වරින් වර සිහිකර දෙතත් මිහිකත් බලේ

එයද තව එක් අංගයකි මේ හපන් ජපනගෙ දිවි පෙතේ

මැදින් මස මැද හරියෙ සිදු වූ භූමිකම්පාවෙන් ජලේ

කළබවා මහ මුහුද රට වෙත සුනාමිය ලෙස පා කලේ

දිනුව මිහිකත මෙවර නම් පරදා මිනිස් බලයන් ලොවේ

සුණු විසුණු කර වෙරළබ සැඩ පහර රට මැදටත් ගියේ

දහස් ගණනින් ජීවිතද අහිමිව ගියත් නොසිතූ ලෙසේ

හැකි වේද නවතන්න මේ දන බැරි වුනා නම් යුධ කලේ

සුනාමිය නොව ඉරත් හා සඳ එකට වැටුණත් මිහිමතේ

හෙට දිනේ සිට පුරුදු ලෙස වැඩ කරයි වඩමින් වෙර සිතේ

මෙයයි ජපනගෙ රහස ඉන්නට උඩම දියුණුවෙ හිනි පෙතේ

ඔසවන්න හිස නුඹට හැකි වේ නිපොන් ජින් ගන්බත්තේ