හැකිද නෑවිත් ඉන්න

 

සමු නොදී සමුගත්තු

කෙනෙකු යළි නොඑනු ඇත

පැවසීමි හදවතට

මඟ නොබල හිදින ලෙස

හිරු එක්ක සඳු එක්ක

කාලයද නොනවතිත

තනිය ඔසුවක් වෙලා

ම'සිත සුවපත් කරන

යළිඳු හිත රිදෙන්නට

වරදකරු නුඹම නොව

ගිය නුඹට යළි යළිත්

දොර හරින මගෙ හිතය

තැළුණු හිත සුවපත්ව

සුව අතට හැරෙන දින

අහඹුවක් ලෙසින් හෝ

හැකිද නෑවිත් ඉන්න

හිතවත....

'හිත' නම් මගේ හිතවත

කුළුනින් සෙමෙන් අදරින

විමසමි පෙරත් දිනයක

නුඹ මඟහැරපු පැනයම

මලින් බර වන වස්සන

ගිම්හානයක උණුසුම

සීත හිම කැටියක

වෙනස නුඹහට පෙරත් දැනුනිද

මටත් හොර රහසෙම

ඔහු ගෙන නුඹව අත්කර

ඒ හදේ ඇති ගැඹුරුම

තැනක තැබුවා බොහෝ සුරැකිව

ඉතින් යළි ටිකකට

ළඟට ආවොත් හිතවත

මෙයයි නම් ප්‍රේමය

පසක් කරවා දෙමිය නුඹහට

ප්‍රේමය සොයා කතරක
එහෙ මෙහෙ දුවපු සකිසඳ
නුඹ ආදරෙන් සනසන

ඔහුගෙ හිත ලඟ රැඳෙනු හිතවත